[ Login ]
There are 8 days until our 13th anniversary!
Serving Since:
December 06, 2001
for 4739 days

tig_los_hlub
Total 14 Articles
Articles by tig_los_hlub
Wild Rooster's Journey to Freedom
THIS IS NOT AN AD, but ENCOURAGEMENT.Questions to ask yourself:1) If you know of a Hmong millionaire. . . Full Story
LUS ZAIS TXHAWB SIAB II
Kuv yuav txais tos hnub no nrog txoj kev hlub nyob hauv kuv lub siab. Qhov no yog qhov lus . . . Full Story
Paj Hnub Hli: Noob Neej Leej Ntxhais Zoo Nkauj
Chiv keeb huam huaj txwv laus puaj tiam ntuj qhib sim los mus, lub ntuj xeeb tau noob neej thiab n. . . Full Story
Dab Neeg Hmoob TXHAWB SIAB
Tsoom kwv tij nkauj muam Hmoob sawv daws, kuv muab ib zaj dab neeg uas hnov ntev ntev tag kev los la. . . Full Story
Nco Ua Dab Muag
Nco Ua Dab Muag Thaum kuv ntsib koj wb yeej tsis sib nyiamZoo li neej thiab dab nyias muaj nyias ci. . . Full Story
[ View More ]

Dab Neeg Zaj Back
By: tig_los_hlub on March 27, 2013, 10:00 pm Views: 126105

DAB NEEG ZAJ


Cua tuaj ntxuj ntxiag, tauj nqeeb txhawv puv toj roob hauv pes. Hluas Nraug Hmoob sawv ib leeg ntawm ntug dej uas xiav lus ntsiav ntsoov rau pug tim qab ntug. Nws tsis zoo nraug thiab ntxim nyiam saum daim tawv, tab sis tus hluas nkauj twg yog tau paub nws yuav xav tau nws los ua lawv tus txij tus nkawm mus txog hnub kawg. Nws txawm tsa suab hais tias:


 


Neeg lub neej thiab txoj kev npau suav, nws yog tiag los yog cuav? Muaj qee zaus kuj tsis txaus ntseeg, muaj qee zaus ua rau kuv tsim duj dheev hauv duab dab ntub los nyob ntuj teb tag hmo nrog txoj kev seev thiab txoj kev nco koj ib leeg.


 


Vim txoj kev nco koj ua rau kuv niaj hnub niaj hmo ua neeg nyob tsis tsheej, kuv lub siab no yuav ua cas nco koj mus tag kuv sim neej? Sij hawm twb dhau zuj zus-ib hnub dhau ib hnub, ib hlis dhau hlis, kuv nplooj siab nplooj ntsws yuav ua cas tshua koj mus ib txhis?


 


Ib txij hmo kuv ntsib koj hauv kev npau suav, kuv tus kheej niaj hnub niaj hmo nyob kho siab khuj khuav. Koj txoj me kev zoo nkauj thiab lub cev ntaj ntsug cob xub, twb ua rau kuv ntshaw ntshaw koj tsis txawj tag los ua kuv tus hlub. Koj lub suab hais lus luag ntxhi thiab ntsej muag luag nyav, twb ua rau kuv ntshaw ntshaw koj tsis paub hais li cas xyov thiaj tau koj los ua kuv tus tav.


 


Ab…kheev lam neej thiab dab txhob muaj ciam li yav thaum ub, kom wb kev mus los sib cuag txhob nyob ntxiv hauv duab dab ntub. Yog neej thiab dab rov tsis muaj ciam li thaum ub dua ib zaug, kuv thov cog lus yuav tuaj coj koj los ua kuv me poj-niam mus txog hnub kuv lub cev qaug.


 


Vim kuv yog noob neej koj yog nkauj zag wb thiaj li tsis sib cuag, kuv thiaj ceeb laj laj rov tau hnov koj lub me suab luag. Lub ntuj tsaus ntais thaum twg ces, kuv mam tau rov tuav koj txhais tes. Thaum twg lub ntuj rov kaj, ces kuv twb nyob kuv rov rau saum Yaj. Wb txoj kev hlub yog mus zoo li no xwb, puas yuav muaj hnub koj thiab kuv tau ua txij ua nkawm hauv kuv lub qab-ntuj khwb?


 


Xav txog txhua thaj chaw zoo nkauj koj coj kuv no mus ncig, cas yuav tsis yog kuv lub cev ntaj ntsug tiag tiag es tsuas yog kuv tus me ntsuj plig? Xav txog koj coj kuv mus ncig hauv qab-thus dej ntshiab li ntshi, ua rau kuv tsim dheev los yeej tsis xav ua neeg nyob tsuas xav tuag nrog koj mus li nthi. Xav txog koj coj kuv ya saum ntuj nrog huab nrog cua, kuv tsim thaum twg rov los ces nplooj siab nplooj ntsws tsuas xav nrog koj rov ua ib ke dua.   


 


Cas koj yuav nyob hauv dej kuv yuav nyob nruab nqhuab, yuav ua rau kuv niaj hnub nyob ib leeg seev yuj yees txog koj ntsiav ntsoov ntuj ntsuab. Cas nrog koj thaum twg kuv no muaj kev kaj siab, cuag li kuv rov plhis dua muaj lub neej tshiab. Cas khawm koj thaum twg nyob hauv kuv xub ntiag, kuv lub siab xav twj ywm tias kheev lam yog ib txhis es txhob yog ib pliag. Cas muaj koj nrog ua ke nraim ntawm kuv ib sab, ua rau kuv seev lawm twj ywm hauv nruab siab tias kheev lam yog tiag es koj yog kuv tus me nkauj nyab.


 


Sim neej no, puas muaj leej twg coj tau kuv tuaj cuag koj ib pliag seb kuv lub siab nco koj puas yuav zoo hlo? Yog txoj kev tuag xwb thiaj yuav pus tau kuv tuaj nrog koj nyob puag koj cia mus ib sim rau Yeeb-ceeb, cia kuv mam ua ib siab tsis ua pa ntxiv nyob saum Yaj-ceeb, vim txoj kev nrog koj thiaj ua rau kuv lub neej no muaj nqis, yog tau koj lawm kuv cog lus rau lub ntuj daim av yuav hlub koj mus ib txhiab ib txhis. Nyob saum Yaj-ceeb no tsis tau koj los kav liam, kuv txaus siab hlo nrog koj mus ua neej lawm hauv pas zaj ua koj tus zoo txiv thiab txais koj ua kuv tus me poj-niam.


 


Nkauj zag yuas nkauj zag, cia kuv tuag nthi los es thiaj tau puag koj ib sim rau kuv txhais npab thiab nrog koj pw ib txag. Nkauj zag yuas nkauj zag, cia kuv tuag nthi los es thiaj tau tuav koj ob txhais tes mus ib sim kom zoo kuv siab tsis txawj tag.


 


Kuv me hluas nkauj zag nyob 9 lub yis ntuj 8 lub yis teb, nyob lawm pug paj zaj pas dej ntshiab pas dej ntxhee ntuj ncua kev deb. Kuv me hluas nkauj zaj txwg zaj laug ntxhais nkauj ntxawm lis Paj Tawg Nra, kuv tuaj txog thaj chaw wb tau teem tseg thaum uas koj coj kuv wb nrog huab sib tw ya. Koj tawm lis plaws tam sim no tuaj nrog kuv txuas lus, seb koj puas coj tub ntsoj tub ntsuag li kuv no tiag tiag nrog koj mus? Koj tawm lis plho tuaj tam sim no kuv muaj lus yuav nrog koj tham kom meej, seb koj puas coj tub ntsoj tub ntsuag li kuv no tiag tiag mus nyob lawm hauv koj lub ntuj ceeb tsheej?


 


Ntuj tsaus ntais teb tsaus nti ib tog tuaj. Cua nplaws ntws ua tauj nqeeb coj ntsuag qees. Dej txawm npau npuas duj dam li dej rhaub. Tawm plaws nrov ‘plog’ hauv pas dej tuaj yog ib tug zaj ntsuab-xiav-lus, ib liab plwb ploog, ya khaub zig ntuj 3 ntxees los khiav yeev ncig Hluas Nraug Hmoob, tso plhuav tob-hau, luaj lub tsheb me, rau ntawm Hluas Nraug Hmoob xub ntiag. Nws txawm cev tes hlo mus plhws lub tob-hau zaj thiab hais ntxiv tias:


 


Kuv zaj txwg zaj laug ntxhais nkauj ntxawm lis Pa Tawg Nra tus kuv nco, wb lub caij nyoog teem tseg yog nyob rau hnub no. Kuv yeej muab xav txhij txhij txhua txhua tag lawm, nyob Yaj-ceeb yeej tsis muaj hnub wb tau ua txij ua nkawm. Tus neeg txom nyem zoo li kuv no tsis muaj dab tsi muab tau rau koj, tsuas muab tau lub siab ncaj ncees thiab lub siab hlub koj mus txog hnub uas kuv no dua toj. Txoj kev wb yuav sib sau los ua neej, koj twb muab xav txhij txhij txhua txhua tias koj yuav yuav kuv tsheej lawm pos?


Ob lub qhov muag zaj qi muag nti, lub cev khiav khaub zig lees Hluas Nraug Hmoob, txia ntshis ua ib tug ntxhais hluas nkauj plaub hau npws loo txij duav, ntsej muag dawb mos nyoos tshiab khiv, cev los yiag txias, qhov muag los qab zib, hnav ib ce tiab xim xiav lus ntev loo, ya sis niab thaum cua ntsawj ib vuag ib vuag. Zaj txwg zaj laug ntxhais nkauj ntxawm, zoo nkauj zoo tiag tiag li, zoo tshaj nkauj mab zoo tshaj nkauj suav, tus hluas nraug twg pom xwb ces yeej xav tau nws ua poj-niam. Hluas nkauj zag txawm hais tias:


 


Hluas Nraug Hmoob, kuv tus me nraug txuj, wb lub neej yuav zoo tsis tim yuav yog koj no muaj txiag nplua nuj. Nyiaj txiag xwb kuv tsis ntshaw mog, tab sis koj lub siab huv, siab loj, siab ncaj ncees, thiab txoj kev hlub kuv, yog yam uas yuav kav kuv mus kom kawg.


 


Kuv yeej muab xav txhij xav txhua tag los lawm ntev, tias koj thiaj yog tus kuv yuav txais tos los ua kuv sev. Xub-zeb suav tsis txhij, hnub-qub suav tsis txhua, hluas nraug yeej muaj coob, nraug txuj yeej muaj ntau, tiam sis koj ib leeg xwb thiaj yog tus uas kuv xaiv tau.


 


Hluas Nraug Hmoob thiaj teb tias:      


 


Yog li no, wb tej lus cia lub ntuj nrog hnov ua pov thawj, cia tus dej no lav ua pov txwv. Kuv txoj sia yog koj txoj, koj txoj sia yog kuv siav. Pa Tawg Nra thiab Hluas Nraug Hmoob yuav thov los ua txij ua nkawm, lub neej saum Yaj-ceeb, kuv ua ib siab muab tso tseg txij hnub no mus lawm. Thov lub ntuj koj nrog foom txoj koob txoj hmoov zoo rau tub ntsuag li kuv mus ua lub neej nrog huab tais zaj laug ntxhais nkauj ntxawm kom tsuas ntsib txoj kev zoo.


 


Dej feeb hlo rau ob sab, ib lub qhov rooj ci ntsa iab tshwm plaws tuaj nruab nrab. Hluas Nraug Hmoob rub hlo Paj Tawg Nra puag hauv xub ntiag ua zaum kawg rau nws txoj kev ua neeg saum Yaj-ceeb. Nkawm tuav tes rawv mus nkag rau hauv lub qhov rooj ntug. Dej rov los npog nkaus nkawv txoj kev, txhua yam rov zoo li qub.    


 


Txhua niaj txhua xyoo rov txog lub sij hawm qub, Hluas Nraug Hmoob thiab Paj Tawg Nra yeej ya tuaj mus ncig thiab txia ua neeg tuaj taug kev ntawm nkawv thaj chaw tshua.


 


 


By Leo Vue


 


 





 Comments Add a Comment

Articles
Kuv Me Nkauj Npausuav  September 26, 2014, 6:37 pm
Yog Vim Dab Tsi  September 24, 2014, 4:49 pm
vim tsis qhia  September 24, 2014, 4:31 pm
Kuv Thov Txim  September 24, 2014, 4:15 pm
Kuv Nco KOJ  September 3, 2014, 10:22 pm
Wild Rooster's Journey to Freedom  June 11, 2014, 12:08 am
LUS ZAIS TXHAWB SIAB II  March 9, 2014, 5:14 pm
Paj Hnub Hli: Noob Neej Leej Ntxhais Zoo Nkauj  February 25, 2014, 5:14 pm
YUAV TAU SIV HOS.  February 6, 2014, 4:44 pm
Dab Neeg Hmoob TXHAWB SIAB  December 6, 2013, 7:04 am
Submit Article  Back